心淡劈炮　羅敏莊：關係緊要過實力！

FACE週刊 第302期

羅敏莊手機內盡是剛滿 4個月的寶貝女兒陳禛的相片和影片：「本來就有專心湊女嘅打算，加上佢哋有啲做法令我唔舒服，咁就索性唔做。」

老公陳國邦大熱倒灶失男配角獎，自己又因為臨近續約被公司冷待，加入無綫 15年，代表作幾乎係零，羅敏莊心灰意冷去意已決，上週有報道指她眼濕濕控訴「荒廢 15年青春得個桔！」

羅敏莊說兩公婆現時在大埔的 900呎私人樓已經供滿， 45歲老來得女的陳國邦亦甚知足：「老公有戲做就別無他求，佢賺嘅錢夠支出，我就可以做啲自己想做嘅嘢。」 羅敏莊認為 TVB代自己不薄：「其實機會都唔少，又有得唱歌同做音樂節目主持，係唔夠自由啫！我最享受舊年自己一手一腳做演唱會，又開心，又賺到錢。」

8月滿約離巢期將至，去年尾 38歲羅敏莊因女兒陳禛出世而放大假，現時被派主持《都市閒情》、《今日 VIP》，每日早出晚歸密集式還騷債的羅敏莊苦中作樂：「其實 15年唔係得個桔，最起碼得到我老公！」

老一輩嘅演員都話，呢間公司以前好有人情味，依家唔同晒。問題出喺邊，我唔方便講，總之由我佗住阿囡四、五個月、到坐月期間，藝員部打畀我叫我還騷，我袋咗人工要還騷係天經地義，但係使唔使咁嘅態度先？事後都有高層同監製打過畀我，解釋可能係溝通或者個別部門問題。點都好，呢間公司咁多人，唔係一定要留我，我既然覺得唔舒服、亦都想留番多啲時間去湊女，咁咪唔做囉。

我離開，同陳國邦無關，我哋合約一向獨立，分開傾。佢失咗個男配角獎，我都覺得 make sense，第一，每間公司嘅獎都有自己制度，人哋（古明華）簽咗約（經理人約），做咩要畀個獎街外人？第二，個獎係公司同事投票，我老公喺公司冇乜人脈，又真係好少朋友。

有時講係講得正面，話咩做呢行實力最緊要，其實係人都知，運氣至係最重要。王祖藍話，最後一年喺演藝學院， King Sir（鍾景輝）都係咁講，唔使佢哋做戲叻有咩成就，但一定要打好人際關係……係人都明，你埋到堆、成日一齊玩，有嘢實記得你?！但我老公硬係唔肯出街，人哋叫埋佢食飯，佢都係驚俾人覺得我哋R撈。

呢個時候，好好彩，我哋唔使R撈，亦冇因為呢件事覺得勞氣，樓都供晒啦，老公亦搵得夠使，我終於可以放下電視台嘅壓力做啲想做嘅嘢。老公乜都唔求，有戲畀佢拍就得；我呢，仲可以去唱歌、開演唱會、搞舞台劇，最緊要係多啲時間對住個囡，我哋仲諗住生多個添，到時又要再多啲時間。

不獲續約，又欠騷債，羅敏莊近日因此被派擔任《都市閒情》等低收視節目抵債：「又唔好話人派我做埋啲唔等使嘢，袋得人工就要還騷係天經地義。」

去年尾台慶最佳男配角獎，陳國邦大熱倒灶輸給古明華：「我冇諗過一定贏，我老公係街外人，佢喺公司人脈真係好弱。」