邦女百日宴 阮兆祥爭俾錢

結婚四年,陳國邦同羅敏莊舊年生埋 B,兩公婆原本無打算同囡囡搞百日宴,但契爺阮兆祥同佢女友 Crystal企硬,堅持要為契女慶祝。

上星期三(三十日),兩契家喺壽星女陳禛屋企會所開 P,是日到場賓客所著嘅動物服,亦係契媽一手打點, Crystal仲專登同契女一齊扮花豹。
由於陳國邦唔想打攪人,所以冇通知圈中朋友,唯獨鄧萃雯。事緣雯女當日撞手神,打俾羅敏莊嗌食飯,先知佢哋家有喜事,於是唔理咁多,即刻由西貢飛車入大埔,啱啱好,趕得切!
雯女送上門!契爺就爭住俾錢。是日消費約兩萬,阮兆祥埋單,兼且封咗封五位數大利是俾契女。唔……咁鍾意,不如快啲同未來祥嫂拉埋,自己啤件啦。


阮兆祥同女友 Crystal當咗陳國邦個 B係自己個女一樣,錫到燶。
 
陳禛出世七磅三,轉眼已經十二磅,全靠老豆老母撲到奶粉。
 
雯女臨急送上門,係當日唯一冇扮神獸嘅嘉賓。

壹週刊 1196期