陳國邦順番晒 讚無綫反應快


陳國邦(右)與太太羅敏莊出席活動,跟黃浩然互動十足。

藝人陳國邦昨日偕太太羅敏莊(Mimi)及黃浩然出席「公共屋邨歲晚清潔大行動」活動,提到Mimi為年尾約滿的老公發聲,指他未獲無綫重用傾續約,陳國邦昨謂:「公司睇完報道後都好快行動,前日主動搵我傾緊之後嘅合約。(有好條件?)我重視發展機會,就算畀好多錢,但冇嘢做都係浪費時間。

對於前無綫藝員夏雨及苑瓊丹斥無綫苛刻兼吝嗇,陳國邦稱:「區生(無綫高層區偉林)都有公開講有番花紅,仲話畀啲時間公司慢慢改善。我都睇到有進步,好似還騷問題,聽講如果演員唔係退工作而欠騷就唔使佢負擔。」他又透露Mimi八月約滿後因不續約而無須還騷,目前太太亦全力工作,未有欠騷問題。

東方日報

陳國邦擺烏龍 冇人傾續約 因為有排未滿約


陳國邦今日同太太羅敏莊出席活動,大讚無線福利有改善。

陳國邦今日同太太羅敏莊、仲有黃浩然,一齊去油塘出席「家居清潔大使嘉許禮」,早幾日陳國邦同老婆大人出口術、向TVB詐型話無綫唔重視自己、冇人搵自己傾續約,又自認「殘甘草」,呢單嘢,今日又有新進展喇!


黃浩然呢位人夫得閒都有幫手做家務,幫輕太太。

邦邦話:「新聞出街之後,高層同我傾過偈,原來我仲有一年約至約滿。」原來邦邦之前以為自己今年約滿。唔怪冇人搵佢傾續約啦。

無綫前藝員苑瓊丹同夏雨都講過TVB刻薄,但陳國邦今次就撐公司:「我喺TVB咁耐,一直有畀意見。我唔知係咪有新台出現,抑或係轉咗新老闆,而令公司有改變,噚日同經理傾完,佢話TVB今年會有花紅同兩封利是,呢樣已經停咗10年,依家有番真係好,同埋夜晚餐廳關門,依家多咗個小檔口,等半夜開工同事有得食,慢慢改善緊。」

不過陳國邦話太太3月約滿TVB之後,就唔會續約,主力湊女。佢仲爆太太之前因為大肚冇工開而做唔夠騒、家陣無綫要佢還,令陳國邦頗有微言:「我太太大肚,公司冇job畀佢做,唔係佢推工作,但因為咁要還騷就唔公平,我希望無綫可以改善呢個問題。」


有人話陳國邦個樣越來越似黎耀祥, 好似呢張…
 
呢張…兩個拍埋一齊,又唔係好似。
 
但呢張呢…明明係祥仔,但羅敏莊都認錯咗係佢老公。

蘋果日報