遊戲規則 陳國邦


FACE週刊 第288期

上週三( 21日),無綫公布了今年度《萬千星輝頒獎典禮》的最後入圍名單。
完成過在電視城舉辦的記者會,陳國邦趕到一街之隔的本刊影樓接受訪問,我們傳閱着他從電視城帶來、新鮮熱辣的投票單張,話題就從憑《雷霆掃毒》的魔警角色熱透全城卻無法入圍、在微博上怒吼「公義何在」的黃智賢開始。
其實去年得過「最佳男配角」,今年再好發揮,電視台大條道理捧第二個,自然不希望被打壞算盤,遊戲規則就是遊戲規則,鬼叫間電視台唔係你開咩?

我問眼前的男配角大熱候選人「彭三順」陳國邦怎麼看,陳國邦說:「我一入行(89年)就提名金馬獎(《壯志雄心》),93年再提名「香港電影金像獎」(《飛虎雄心》),出道早期我已經經歷過呢種洗禮……唔係,應該係話累積過失敗經驗,我一早學識,反正無法控制,所以無論有定冇,都唔會影響我付出嘅努力。」


陳國邦在台慶劇《大太監》裏飾演的彭三順角色搶鏡,是社交網絡的「萬人 like」,亦是今年台慶男配角獎項大熱。

除了小製作男主角,陳國邦亦做過不少大製作男配角,93年他就獲得劉德華邀請拍攝電影《天長地久》。《忽然1周》圖片

從演藝學院畢業後,首次參演電影《壯志雄心》就獲得金馬獎男配角提名,陳國邦說因此一早被捧高過,亦一早失望過。
02年陳國邦演活電視劇《流金歲月》裏的智障人士佳佳,結果對手胡杏兒獲得當年「飛躍獎」又攀上花旦寶座,十年後陳國邦繼續做綠葉。

93年離開無綫,陳國邦說爬得高賺得也多,更不只一次做電影男主角,包括《廣州殺人王之人皮日記》及《屯門色魔》。

6年前與未結婚生女的陳國邦做訪問,他說過自己還在等一個從綠葉攀上做牡丹的機會,6年後,陳國邦坦言,其實別說黃智賢怒吼,即使是自己最近在《大太監》的連場精湛演出回響如何、網民如何起勢吹捧、如何拿他和視帝黎耀祥比較,自己亦完全沒有留意:「因為我最近嘅世界係得陳禛。」
陳禛,是訪問當天才滿 21天大、陳國邦與太太羅敏莊剛出世的女兒。

陳國邦說,現在的人生,有老婆有愛女還有一份自己深愛又被同業尊重的工作,已經很美好,光環,其實有點多餘。

何謂公道

今年44歲的陳國邦,畢業於香港演藝學院,89年演出第一部電影《壯志雄心》已經被提名金馬獎「最佳男配角」。雖然多年以來不論影圈還是電視台,始終與獎項無緣,不過一直是全民公認的最佳綠葉,在新劇《大太監》的演出更被激讚,網友大力轉發、讚好過兩萬,因此被視為今屆台慶「最佳男配角」得主大熱。

我唔係黃智賢,我唔可以代表佢發言,談論人哋識唔識遊戲規則,我只可以套用自己嘅心態擺喺佢身上。咁多年我都冇獎又冇提名,好多fans、好多同事都係咁講,話替我唔抵、覺得唔公平。自己能夠控制嘅,係對角色嘅創作同演繹,至於提名同獎項,就係我控制範圍之外。一個人鍾意做戲,又獲得大家公認覺得佢演技好,應該唔會太介意呢啲嘢,唔通冇提名我下次就 hea做、攞咗獎我下次就再做好啲咩?

當然,我都唔係一出道就有呢個咁成熟嘅諗法。出道四年內已經試過兩次競逐失敗,喺演藝生涯早期已經發生呢啲嘢,再加上咁多年做人經驗,唔好淨係話獎項,仲有人生,一切無法控制嘅得與失,我都學識唔受佢影響。至於係唔係得到認同就夠、就唔需要光環……其實都仲想要光環嘅……兩次都冇得到,當然想得到。人又好生物都好,都想向好嘅方向發展,有樣好啲嘅嘢擺你面前,重點係,我唔會怨,就算失去,冇嘢可以影響我情緒同付出嘅努力。

萬綠叢中

北上掘金潮,加上新免費電視牌照風雲,電視業風雲色變。紅人固然人見人搶加價跳槽,綠葉甘草輩的,不少也因此扭計講數借位上,重新為自己在市場上定位。連曾經同「呢」的黎耀祥都升格做了視帝,年年傳聞加簽合約換獎換角色……所有外在因素卻都沒有影響陳國邦的動向,繼續心甘命抵在老東家做個安分守己的綠葉王。

兩年前王維基嘅撬人短訊人人有份嗰陣時,我都收過嘅。不過咁啱同無綫續完新約,就冇回覆人。我份人傾約就好似買保險一樣,買嘅時候好似知咩事,簽完名,你問番我份保單其實保啲乜,我完全唔知。再講,同TVB傾合約,條件從來唔係我同佢提出,係佢講,佢講乜咪乜囉。你問我點解唔進取啲、點解唔令自己喺行內搶手啲?我覺得唔需要……有人欣賞認同,我已經好開心;因為得到認同,我嘅工作已經提供到我同屋企人好好嘅生活,咁我仲有咩資格去覺得唔滿意?想得到更多呢?我試過離開TVB七年,嗰七年仲要發展好好添,但凡事有得必有失。我都試過一日趕幾組,做過B級製作嘅男主角、喺大製作同紅星做對手戲、每次電影宣傳我都算得上係一個焦點……嗰陣時係我入行以嚟搵錢最多嘅階段,但亦都係工作質素無法保證、休息時間嚴重不足,同看得失看得最重嘅階段。但係你衣家問番我當時我嗰種懷才不遇嘅心態,其實我已經唔多記得。我好早得到過,亦都好早失敗過,愈早明白時間係最好嘅良藥,你就會對人生大部分嘢舒服好多。第二樣嘢我唔敢講,但我衣家最強嘅係生存能力,無論將來要面對嘅係成功定失敗,我保證,都可以從容面對。

希望工程

09年與拍拖七年的女朋友羅敏莊結婚,上個月20日,女兒陳禛終於誕生。陳國邦說,生存環境一代比一代艱難,兩公婆本來打定主意不會生兒育女。直到在娛樂圈打滾了23年,慢慢學會了生存,開始與羅敏莊改變主意:「生存其實沒那麼難。」

作為一個爸爸,我冇諗過等佢大個,同佢分享自己嘅威水史、有咩咁巴閉,有樣嘢我一直做緊,我收集晒由羅敏莊懷孕開始嘅所有照片同報道,我反而係想畀陳禛知道,佢嘅生命對爸爸媽媽影響有幾大。


02年拍攝《雲海玉弓緣》,陳國邦與同劇演員羅敏莊相戀,09年12月11日,二人正式結為夫妻。
婚後第三年,羅敏莊在舉行個唱之際意外發現懷孕,女兒陳禛上月30日出世。

衣家望住個女,唔使諗嘢,淨係會笑咋……好似以前拍拖同情人觸電嘅感覺一樣,淨係想攬到實一實,想保護佢,一個笑容、一個喊露,睇佢握實小拳頭打吓拳,俾佢緊緊捉住我隻手指……咁就玩半個鐘。人哋BB三個月至抬頭,陳禛力度幾強,飲完奶掃風自己識得拗番正個頭,已經好力啦……哈哈,以前同同事傾偈,成日聽佢哋講,我個BB好乜好物,做乜都話好。原來到我做爸爸,我都係鍾意加個好喺前邊,我都覺得自己嘅BB最好。個女出世,並沒有令到我對呢行嘅鬥心變強。我對佢別無要求,陳禛將來有咩興趣都好、做乜職業都好,最重要似佢爸爸媽媽一樣,專業敬業、得到同行認同,有追求呢種尊嚴嘅心就夠。人生觀淨係建立喺金錢、名利同光環上,好辛苦。我衣家嘅工作同做人態度,正正係對佢嘅身教。

淡定王

陳國邦說甚麼都有條有理、不緊不慢,包括死亡。多年前他就說過,希望自己比羅敏莊活得久,因為自己夠淡定,有信心遇上巨變情緒處理會比老婆強得多。「好多人覺得我哋兩公婆好奇怪,成日好哋哋要講死亡。呢個世界冇童話?,所有美好嘅嘢,縱然眾所周知嗰個《天梯》嘅故事,男女主角都相繼死亡,都有完結嘅一日。我哋兩公婆想陳禛喺我哋身上學到,無論好事定壞事,我哋都可以有一個準備嘅心情,呢個就係我認為做人應該要有嘅生存能力。」

連生離死別都能看得化,難怪入圍獎項還是甚麼主角配角,對陳國邦來說,甚麼都不算。

撰文:朱小博
攝影:范仲良