12月嫁陳國邦　羅敏莊谷胸變波神

日本拍婚照

半裸鴛鴦浴 鍾意搞搞新意思嘅羅敏莊，臨場提議在溫泉影輯夫妻半裸鴛鴦戲水結婚相。這對新人為想赤條條在溫泉拍照，更要求清場，剩下攝影師一個操刀。 扮 o架仔 o架妹 一對新人扮起 o架仔 o架妹，而穿和服梳齊陰頭的羅敏莊則非常 kawaii！ 在日本影婚照期間難得停雨，唔使擔遮，一對新人有心情嘆雪糕。

忽然一周 744期

娛樂頂點
12月嫁陳國邦　羅敏莊谷胸變波神
2009年10月30日

貴人出門招風雨！

拍拖 7年的陳國邦與羅敏莊，原定07年拉埋天窗，卻遇上婚宴場地違反消防條例而被迫將婚期押後至今年 12月。早前兩人到日本拍攝婚紗相竟又遇上颱風。婚事多風多雨，幸而老公阿邦一句：「咁嘅天氣即係寓意我哋打風都打唔甩！」令原本掃興的事反變得浪漫溫馨。
拍攝婚紗相時，準新娘羅敏莊更儼如亞姐上身，由 A Cup力谷至 D cup，以變幻球賀自己終於當上陳太。

舉行婚禮波折重重的陳國邦與羅敏莊，終定今年 12月 4日註冊，並在 3日及 4日在沙田凱悅酒店設宴兩晚，共筵開 40席招呼親人及圈中朋友。怎知無綫竟突然將台慶頒獎禮押後至 12月 4日舉行，令一眾被邀花旦小生如佘詩曼、楊怡及大熱視帝黎耀祥及老友王祖藍等無法分身出席。

托後 32D

托前 32A

未經 nude bra一托，羅敏莊只是 A cup一族（右圖），直至影婚紗照時才一嚐波神滋味，邊拍邊話自己似今屆亞姐。但老公陳國邦見老婆變巨峰，反應唔係噴鼻血，而係老實咁話：「你嘅嘢我都睇晒！」

婚期撞台慶

正所謂黑開有條路，早前二人由婚紗公司 Zara Bride贊助到日本紅葉片片的輕井沢影婚紗相，點知一到步就遇上超強颱風茱莉。天氣由 10多度急降至 7度，四處橫風橫雨，令在室外拍照的羅敏莊和陳國邦又凍又濕，一度令新娘心情低落。但老公陳國邦卻將風雨的狼狽情境，視為天公造美來安慰老婆，「咁就證明我哋打風都打唔甩。太陽好易有，要雨天襯托 book都 book唔到，你睇我哋結婚幾咁特別。」在人前 cool爆的陳國邦，當堂將老婆冧爆，故外在環境雖然是風雨交加，但羅敏莊卻心花怒放。她說：「阿邦就係咁好，永遠都會向好方面諗，所以落住雨影相，我都好開心。我原本打算旅行結婚唔想煩，但佢堅持要喺香港註冊。佢話結婚點解要咁鬼祟，唔想我偷偷摸摸做陳太。」

身為羅敏莊老友，黎瑞恩在婚宴定必「復出」，上台唱歌賀新人。

婚宴變個唱

為了人生大事，羅敏莊與阿邦傾盡幾十萬積蓄搞婚宴，但原本羅敏莊打算用這筆錢開小型個唱圓心願，如今用在婚禮上，故她要將婚宴變成演唱會，滿足唱歌癮。到時賓客阿 B鍾鎮濤同黎瑞恩更分分鐘變成「陳羅聯婚演唱會」表演嘉賓。羅敏莊：「我借婚禮圓我開個唱心願，所以請咗隊 live band，賓客嘅人情其實等如買張演唱會門券，哈哈！到時我班 friend好似黎瑞恩、 B哥哥應該忍唔住歌癮走上台同我爭住唱，總之我預咗十幾首 sweet情歌唱俾大家聽。本來我打算搵人做司儀，但阿邦話我就係佢心目中最佳司儀，所以到時歌手司儀都由我呢位新娘包辦。」陳羅聯婚演唱會，值得期待。

恨嫁恨到嗌出口

十個女仔，九個都係等男方求婚，但羅敏莊卻如烈女愛得轟烈，「其實係我向阿邦求婚。拍拖第2年我就買咗兩隻 Tiffany戒指，叫阿邦嫁俾我，佢即時答咗應。我行咗第一步，要搞婚禮就等男方做。」女友主動求婚，阿邦話當刻一點也不愕然，他說：「同佢拍拖無幾耐，我都諗住結婚，只係佢快我一步開口。」
恨嫁陳國邦恨足7年，終於成為陳太的羅敏莊，更將昔日當歌手時唱的一首〈一顆恨嫁的心〉的歌詞，重新填上〈終極圓滿篇〉送給老公阿邦，將恨嫁心聲唱出嚟。此曲連同其他情歌收錄成一張唱片〈楓戀蜜語〉，在婚宴上送給賓客。

撰文：娛樂組
攝影：攝影組