ICAC點名 陳國邦變洗錦華

廉政公署(ICAC)每隔幾年,都會同無綫合作,將一受矚目嘅貪污大案拍成電視劇集,好似《廉政行動2004》,得到嘅迴響同收視都唔錯。今年,廉記又將近呢兩、三年嘅大案拍成《廉政行動2007》,今個禮拜六(9月1日)開始有得睇嘞!
新一輯分《鐵窗速遞》、《沙丘城堡》、《億萬信用》、《過界》及《空卡》五個單元,分別由馬偉豪、章國明、林超賢及邱禮濤「四大名導」負責。不過,講到最受注目,點計都係以前高級警司冼錦華「以權謀私」案改編嘅《過界》啦。呢集導演係「金像大導」邱禮濤,至於飾演「冼錦華」嘅陳國邦,更係由廉記點名。人強馬壯,加上拍得逼真,難怪警務處長鄧竟成都要大讚:「Good!」
9月1日起逢周六10:30pm 翡翠台

前高級警司冼錦華因「包庇色情場所」,以及接受妓女提供免費性服務,俾人「篤背脊」向廉記投訴。終於由高級警司變為「階下囚」。《過界》就係由冼嘅案件改編,除咗劇中主角冼嘅化身由陳國邦飾演外,苗僑偉則飾執行處高級調查主任,至於安排妓女俾冼嘅林春葉,就由惠英紅飾演。
據講,《過界》入面冼錦華嘅角色,無綫之前曾經提議搵苗僑偉,但廉記方面反而睇中陳國邦。佢哋認為雖然陳嘅外形唔多似冼,而且年紀比較後生,不過陳分別以制服同西裝casting時,廉記覺得佢個look好有冼嘅影子,再加上演技搭夠,就係咁,陳國邦就做咗「熒幕上嘅冼錦華」嘞﹗而負責呢集嘅導演,無綫就搵咗以《八仙飯店之人肉叉燒包》成名嘅邱禮濤。

導演演員夠強勁

《廉政行動2007》幕前幕後嘅陣容都好強勁,影視界有「有名有姓」嘅明星藝員李修賢、米雪、廖啟智等演技派之外,楊思琦、吳卓羲、傅穎等一眾人氣偶像都有份。
至於導演群,「四大名導」更加唔使o徙口水介紹啦,當中除咗馬偉豪之外,其餘林超賢、章國明及邱禮濤都曾經替《廉政行動2004》操過刀,駕輕就熟。

《鐵窗速遞》9月1日

古仔係講懲教署高層懷疑有職員協助獄中囚犯偷運非法違禁品,包括女人裸照等,於是同廉記合作,終於揪出一個涉案嘅二級懲教助理,仲當場喺佢身上搜出違禁品。
演員:陳錦鴻、黃德斌、袁彩雲、阮兆祥、李國麟
導演:章國明
阮兆祥飾演替犯人偷運違禁品嘅懲教署職員,最後東窗事發,俾陳錦鴻等廉署調查員捉到正。

《沙丘城堡》9月8日

呢集就係以轟動一時嘅元州街短樁案改編。地基承建公司利用監管漏洞而偷工減料,終於令兩座四十一層高嘅大廈出現嚴重沉降。為保公眾安全,房署決定將呢兩座樓拆卸,而廉記亦介入,調查出短樁涉及貪污及受賄證據。
演員:丘凱敏、黃浩然、梁漢文、姚嘉妮、金興賢
導演:章國明
為調查短樁事件,身為廉記調查組嘅梁漢文得身入工地作埋身追擊。

《億萬信用》9月15日

當廉記正處理一單誣告貪污案時,同時揭發出另一單牽涉地產富商與銀行高級職員非法勾結嘅億萬商業詐騙案。雖然係咁意透露咗少少劇情出嚟,不過肯定觀眾一定記起同早兩年「豪宅大王」秦錦釗嘅詐騙案相同。冇錯啦,呢集咪即係呢單案囉!
演員:李修賢、楊思琦、羅家英、顧紀筠、蔣志光
導演:林超賢
「豪宅大王」秦錦釗詐騙銀行過億信用狀,但上得山多終遇虎,最後要鋃鐺入獄。而《億》入面秦錦釗角色,則由羅家英扮演。

《過界》9月22日

廉署收到投訴,話高級警司收受利益包庇色情場所,於是展開調查及拘捕行動。法庭就將以「以權謀私」罪對警司作出起訴。
演員:陳國邦、苗僑偉、吳卓羲、惠英紅、傅穎
導演:邱禮濤
武打女星惠英紅喺《過界》入面飾演關鍵人物林春葉,提供妓女為冼作免費性服務。

《空卡》9月29日

賊公計、狀元才。九鐵職員利用火車貨卡進行走私活動,因為貨運系統就快進行電腦化,廉署只得一個月時間進行調查,搵出幕後犯罪者。
演員:李修賢、陳芷菁、廖啟智、米雪。
導演:馬偉豪
「智叔」廖啟智喺《空卡》入面飾演九鐵員工,為咗幫人而墮入貪污漩渦,最後仲搞到家破人亡。據講喺咁多集故事中,呢集係最淒涼,睇到你喊咁話。

前高級警司冼錦華(中)因接受夜總會媽媽生提供免費妓女嘅性服務,遭廉記起訴,以致走上自毀之路。個案被廉記拍成劇集搬上熒幕。 陳國邦飾演冼錦華,雖然外形不足,勝在有演技。廉記辦事一向「精明眼」,絕對冇睇錯人嘅! 扮乜似乜,真係服咗你!(設計對白)
雖然廉記喺調查冼貪污期間,同警隊發生少少摩擦;但鄧一哥依然力讚話劇集拍得逼真;尤其對陳國邦飾演嘅冼錦華更直豎拇指。

忽然一周第631期 http://www.atnext.com/
轉載自網易論壇 http://bbs.ent.163.com/board/postlist.jsp?b=tvb